မကြာသေးခင်ကပဲ ဒါရိုက်တာ Todd Philips ဟာ Joker 2 အတွက် ဇာတ်ညွှန်းရေးပြီးသွားပြီလို့ဆိုကာ Joker 2 ထပ်မံထွက်ရှိလာဦးမယ်လို့ အတည်ပြုလိုက်ပါတယ်။ Joker ရုပ်ရှင်ကတော့ ၂၀၁၉ ခုနှစ်မှာ ထွက်ရှိတာဖြစ်ခဲ့ပြီး ဒါရိုက်တာ Todd Philips ကပဲ ရိုက်ကူးထားကာ Joaquin Phoenix က အဓိက ပါဝင်သရုပ်ဆောင်ထားပါတယ်။ ဒီရုပ်ရှင်ကတော့ အော်စကာနှစ်ဆုတောင် ရရှိထားပြီး ပရိသတ်အကြိုက်လည်း ဖြစ်ခဲ့ပါတယ်။ အခုကတော့ ဒီရုပ်ရှင်ရဲ့ နောက်ဆက်တွဲ Sequel ဇာတ်လမ်းကို မြင်တွေ့ရတော့မှာ ဖြစ်ပါတယ်။
ဒီရုပ်ရှင်ကတော့ Box-Office မှာ ပထမဆုံး ဝင်ငွေဒေါ်လာ(၁)ဘီလျံကျော်ခဲ့တဲ့ R-Rated ရုပ်ရှင်အဖြစ်လည်း စံချိန်တင်ခဲ့ပါတယ်။ ပရိသတ်တွေကတော့ ဒီရုပ်ရှင်ထွက်ပြီးကတည်းက Sequel ထွက်ရှိလာဖို့ တောင်းဆိုနေကြတာ ဖြစ်ပါတယ်။ ယခုဆိုရင်တော့ ပရိသတ်တွေ တောင့်တနေတဲ့ Joker 2 ထွက်ရှိလာဖို့ဟာ သေချာသွားပြီ ဖြစ်ပြီး Joaquin Phoenix ကပဲ Arthur Fleck အနေနဲ့ ပြန်လည်ပါဝင်လာဦးမှာ ဖြစ်ပါတယ်။
မကြာသေးခင်ကပဲ ဒါရိုက်တာ Todd Philips ဟာ Joker 2 ဇာတ်ညွှန်းရဲ့ ကာဗာနဲ့ Joaquin Phoenix က အဲဒီဇာတ်ညွှန်းကို ဖတ်ရှုနေတဲ့ပုံကို အင်စတာဂရမ်ပေါ်မှာ မျှဝေပေးခဲ့ပါတယ်။ အဲဒီကာဗာမှာတော့ Joker: Folie a Deux လို့ ရေးသားထားပြီး လူနှစ်ယောက်ရဲ့ ရူးသွပ်မှုလို့ အကြမ်းဖျဉ်း ဘာသာပြန်နိုင်ပါတယ်။ ဒါကြောင့်ပဲ Joker 2 ထဲမှာတော့ Joaquin Phoenix ရဲ့ Joker အပြင် တခြား Joker တွေကို မြင်တွေ့ရဦးမလားဆိုတာ စိတ်ဝင်စားစရာပဲ ဖြစ်ပါတယ်။
View this post on Instagram
ပရိသတ်တွေကတော့ Willem Dafoe ရဲ့ No Way Home ထဲက သရုပ်ဆောင်မှုကို မြင်တွေ့ပြီးနောက်မှာ မင်းသားကြီးကို Joker အနေနဲ့ ထည့်သွင်းရိုက်ကူးဖို့ တောင်းဆိုခဲ့ကြပါသေးတယ်။ ယခုအချိန်မှာတော့ Joker 2 ရဲ့ ဇာတ်ညွှန်းဟာ ပြီးစီးသွားပြီ ဖြစ်တာကြောင့် မကြာခင်မှာ ရိုက်ကူးရေး စတင်တော့မှာ ဖြစ်ပါတယ်။ ဒါကြောင့်ပဲ ရုပ်ရှင်ကတော့ ၂၀၂၃ ခုနှစ်နှောင်းပိုင်း၊ ဒါမှမဟုတ် ၂၀၂၄ ခုနှစ် နှစ်ဆန်းပိုင်းတို့မှာ ထွက်ရှိလာနိုင်ပါတယ်။ ပရိသတ်တွေ စောင့်မျှော်နေကြတဲ့ Joker 2 ထဲမှာတော့ ဘယ်လို ဆွဲဆောင်မှုရှိတဲ့ ဇာတ်လမ်း၊ ဇာတ်ကွက်တွေကို မြင်တွေ့ရမလည်းဆိုတာ စိတ်ဝင်စားစရာပါပဲ။
Legos
Source: Screenrant