Iman Vellani ကတော့ နောက်ဆုံး ထွက်ရှိထားတဲ့ MCU ဇာတ်လမ်းတွဲ Ms. Marvel ထဲက အဓိကသရုပ်ဆောင် ဖြစ်ပါတယ်။ Captain Marvel ကို လေးစားအားကျတဲ့ ဆယ်ကျော်သက်ကောင်မလေး Kamala Khan ဇာတ်ရုပ်ကတော့ သူမရဲ့ ပထမဆုံး တီဗွီဇာတ်ရုပ် ဖြစ်တဲ့အပြင် ဒီကာရိုက်တာဟာလည်း MCU ရဲ့ ပထမဆုံးသော မူစလင် စူပါဟီးရိုး ကာရိုက်တာ ဖြစ်ပါတယ်။
Ms. Marvel ဇာတ်လမ်းတွဲနဲ့အတူ MCU ပရိသတ်တွေကြားမှာ အောင်မြင်ကျော်ကြားလာတဲ့ Iman Vellani ကတော့ အသက်(၁၉)နှစ်သာ ရှိသေးတဲ့ ဆယ်ကျော်သက် သရုပ်ဆောင်မလေး ဖြစ်ပြီး ရှေ့နှစ်မှာ ထွက်ရှိလာမယ့် The Marvels ရုပ်ရှင်ထဲမှာလည်း ထပ်မံ ပါဝင်လာဦးမှာ ဖြစ်ပါတယ်။ Ms. Marvel ဇာတ်လမ်းတွဲကို ကြည့်ရှုပြီး သရုပ်ဆောင် Iman Vellani ရဲ့ဘဝအကြောင်း တစေ့တစောင်း သိရှိလိုတဲ့ စာဖတ်သူတို့အတွက် သူမရဲ့ပုဂ္ဂိုလ်ရေး ဘဝအကြောင်းကို ဖော်ပြပေးလိုက်ပါတယ်။
ပုဂ္ဂိုလ်ရေးအကျဉ်း
Iman Vellani ဟာ ၂၀၀၂ ခုနှစ် စက်တင်ဘာလ(၃)ရက်နေ့မှာ မွေးဖွားခဲ့သူ ဖြစ်ပြီး လက်ရှိမှာ အသက်(၁၉)နှစ် ရှိနေပါပြီ။ သူမဟာ ပါကစ္စတန်နိုင်ငံ၊ ကရာချိမြို့မှာ မွေးဖွားခဲ့သူဖြစ်ပြီး အသက်(၁)နှစ်အရွယ်မှာပဲ မိသားစုနဲ့အတူ ကနေဒါနိုင်ငံကို ပြောင်းရွှေ့လာခဲ့တာ ဖြစ်ပါတယ်။
Ms. Marvel ဇာတ်ကောင်ရဲ့ အမာခံပရိသတ်တစ်ယောက် ဖြစ်ပါတယ်။
Iman Vellani ဟာ Ms. Marvel ဇာတ်ကောင်ကို သရုပ်မဆောင်ရသေးခင်တည်းက ဒီဇာတ်ကောင်ကို နှစ်သက်အားပေးသူ ဖြစ်ပါတယ်။ သူမဟာ တစ်ခါတုန်းကဆိုရင် ဟောလိုးဝင်းပွဲတော်အတွက် Ms. Marvel ဝတ်စုံကိုတောင် ဝတ်ဆင်ခဲ့ဖူးပါတယ်။
“Ms. Marvel အတွက် လူရွေးပွဲဝင်ပြိုင်ခဲ့တာက Ms. Marvel ကိုရော၊ အဲဒီကောမစ်ကိုပါ အရမ်းစွဲလန်းနေတာကြောင့်ပါ။ ဒီကာရိုက်တာကို အရမ်းကြိုက်သလို Marvel universe ကြီးကိုလည်း အရမ်းချစ်ပါတယ်။ အဲဒီစိတ်တွေကပဲ ကျွန်မကို မောင်းနှင်ပေးနေတာပါ။ အဲဒါက ကျွန်မရဲ့ပထမဆုံး လူရွေးပွဲဝင်ပြိုင်ဖူးတဲ့ အတွေ့အကြုံပါ …”
“ကျွန်မ ဘာလို့ အဲဒီမှာ အသည်းအသန် ဝင်ပြိုင်ချင်တာလည်းဆိုတော့ Marvel မှာ အဲဒီကလူတွေနဲ့ ဆုံဖူးချင်တာကြောင့်ပါ။ ကျွန်မထင်တာတော့ ဒီလောကကြီးကို ကျွန်မဘယ်လောက်ထိ ရူးသွပ်တယ်ဆိုတာ သူတို့မြင်သွားပြီး Kamala ကို အသက်သွင်းဖို့အတွက် ယုံကြည်စိတ်ချစွာနဲ့ ဒီအခွင့်အရေးကို ပေးလိုက်တယ်လို့ပဲ ထင်ပါတယ် … ” လို့ Vellani က People မဂ္ဂဇင်းနဲ့ အင်တာဗျူးမှာ ပြောထားပါတယ်။
Ms. Marvel ဟာ သူမရဲ့ပွဲဦးထွက်ဇာတ်ကောင်ပါ။
Vellani ဟာ ယခင်တုန်းကတော့ ဇာတ်လမ်းတိုအချို့မှာ အနည်းငယ် ပါဝင်ခဲ့ဖူးပေမယ့် Ms. Marvel ဇာတ်ကောင်ဟာ သူမရဲ့ ပထမဆုံးသော တီဗွီဇာတ်ကောင် ဖြစ်ပါတယ်။ အလားတူပဲ အဓိကဇာတ်ကောင်အနေနဲ့ သရုပ်ဆောင်ခဲ့ရတဲ့ ပထမဆုံး ဇာတ်ရုပ်လည်း ဖြစ်ပါတယ်။ ဒါ့အပြင် ၂၀၂၃ ခုနှစ်မှာ ရုံတင်ပြသမယ့် The Marvels ရုပ်ရှင်နဲ့ ရုပ်ရှင်ဘက်မှာလည်း ပွဲဦးထွက်လာဦးမှာ ဖြစ်ပါတယ်။
မူလက သရုပ်ဆောင်ဖြစ်ချင်ခဲ့တာ မဟုတ်ပါဘူး။
Vellani ဟာ ပြဇာတ်မေဂျာနဲ့ ပညာလေ့လာ ဆည်းပူးနေပေမယ့် မူလတုန်းကတော့ သူမဟာ သရုပ်ဆောင်ဖြစ်ချင်ခဲ့တာ မဟုတ်ပါဘူး။ “ကျွန်မ အထက်တန်းကျောင်းကို ပြဇာတ်နဲ့ တက်နေတာနဲ့ သရုပ်ဆောင် ဖြစ်လာမှာ မဟုတ်ဘူးလို့ လူတိုင်းကို ပြောခဲ့ဖူးပါတယ်။ ပြီးတော့ ကျွန်မတက်နေတာ art school ပါ။ အထက်တန်းပြီးသွားတာနဲ့ လူတွေက arts ကို စိတ်ဝင်စားကြတော့တာ မဟုတ်ဘူးလေ …”
“အဲဒါကြောင့် ကျွန်မကတော့ နည်းပညာသုံးပြီး medium အမျိုးမျိုးနဲ့ arts တွေ လုပ်ကြည့်ချင်ခဲ့တာပါ။ ဒါပေမယ့် အခုတော့ ကျွန်မ ဒီကိုရောက်နေပြီလေ။ အဲဒီတော့ ရေမြှုပ်တစ်တုံးလိုပဲ တွေ့သမျှအရာတွေအားလုံးကို လိုက်ပြီးစုပ်ယူနေရတာပေါ့။ လူတွေအများကြီးဆီကနေ ပညာတွေလည်း အများကြီး သင်ယူခွင့် ရခဲ့ပါတယ် …” လို့ Vellani က ဆိုပါတယ်။
သူမရဲ့အကြိုက်ဆုံး Marvel ဇာတ်ကောင်ဟာ Captain Marvel မဟုတ်ပါဘူး။
Vellani ရဲ့ ကာရိုက်တာဖြစ်တဲ့ Kamala Khan ဟာ Captain Marvel ကို အလွန်လေးစား အားကျသူ ဖြစ်ပေမယ့် သရုပ်ဆောင်ကိုယ်တိုင်ရဲ့ အကြိုက်ဆုံး ဟီးရိုးဇာတ်ကောင်ကတော့ တခြားတစ်ယောက် ဖြစ်ပါတယ်။ Vellani ရဲ့ အကြိုက်ဆုံး စူပါဟီးရိုးကတော့ MCU ကိုစတင်ခဲ့တဲ့ Iron Man ဖြစ်ပါတယ်။ အင်တာဗျူးတစ်ခုမှာတော့ Vellani ဟာ သူမအနေနဲ့ Kamala Khan လိုပဲ AvengerCon ကို တက်ရောက်ရမယ်ဆိုရင် Iron Man ရဲ့ဝတ်စုံကို ဝတ်ဆင်သွားမယ်လို့တောင် ဖြေထားဖူးပါသေးတယ်။
Vancouver
Source: people/wiki