Spider-Man: Across the Spider-Verse ဇာတ်လမ်းကတော့ မကြာသေးခင်ကပဲ ထွက်ရှိခဲ့ပြီး ပရိသတ်တွေရဲ့ တခဲနက်အားပေးမှုကို ရရှိထားပါတယ်။ ဒီဇာတ်လမ်းထဲမှာတော့ Spider-Man Variant ပေါင်းများစွာကို မြင်တွေ့ခဲ့ရပြီး စိတ်ဝင်စားစရာ ဇာတ်ကောင်တွေနဲ့လည်း ပြည့်နှက်နေပါတယ်။ ဒါ့အပြင် Sony ဟာ ဇာတ်ကောင်တွေကို ပြောင်းလဲမှုတွေများစွာ ပြုလုပ်ထားပါတယ်။ ဒါကြောင့်ပဲ ဒီတစ်ခါမှာတော့ Spider-Man: India ရဲ့ ကောမစ်ထဲက Origin နဲ့ စွမ်းအားတွေကို ဖော်ပြပေးချင်ပါတယ်။
Origin
Pavitr Prabhakar ကတော့ ၂၀၀၄ ခုနှစ်မှာ ထွက်ရှိခဲ့တဲ့ Spider-Man: India #1 ကောမစ်ထဲမှာ စတင်ပါဝင်ခဲ့ပါတယ်။ Pavitr ကတော့ အိန္ဒိယနိုင်ငံရဲ့ ရွာလေးတစ်ရွာမှာ မွေးဖွားခဲ့ပြီး Mumbai မြို့ကို အဒေါ်ဖြစ်သူ Maya ၊ ဦးလေးဖြစ်သူ Bhim တို့နဲ့အတူ ပြောင်းလာခဲ့ပါတယ်။ Pavitr ဟာ စကောလားရှစ်ကြောင့် ကျောင်းကောင်းကောင်း တက်ခွင့်ရခဲ့ပေမယ့် အခြားကျောင်းသားတွေရဲ့ အနိုင်ကျင့်တာကို ခံခဲ့ရပါတယ်။ သူ့ရဲ့တစ်ဦးတည်းသော သူငယ်ချင်းကတော့ Meera Jain ပဲ ဖြစ်ပါတယ်။ Meera Jain ကတော့ Earth-616 ရဲ့ Mary Jane Watson ကို Inspire ယူပြီး ဖန်တီးထားတာ ဖြစ်ပါတယ်။
တစ်ရက်မှာတော့ Pavitr ဟာ အနိုင်ကျင့်သူတွေလက်ထဲက ထွက်ပြေးနေရင်း ယောဂီတစ်ယောက်နဲ့ ဆုံတွေ့ခဲ့ပါတယ်။ အဲဒီယောဂီဟာ Pavitr ကို ပင့်ကူတစ်ကောင်ရဲ့ စွမ်းအားတွေ ပေးခဲ့ပါတယ်။ ဒါကြောင့်ပဲ Pavitr ရဲ့ Spider-Man Origin ကတော့ အခြား Spider-Man Origin တွေနဲ့ အတော်လေး ကွာခြားနေပါတယ်။ Spider-Man တွေအများစုဟာ Radioactive Spider ကိုက်ခံရတာကြောင့် Spider-Man ဖြစ်လာခဲ့ပေမယ့် Pavitr ကတော့ မှော်ပညာကနေတဆင့် Spider-Man ဖြစ်လာခဲ့တာပါ။
Pavitr ဟာ စွမ်းအားတွေ ရခါစမှာတော့ စူပါဟီးရိုး ပြုလုပ်ဖို့ စိတ်ကူးမရှိသေးပါဘူး။ ဒါကြောင့်ပဲ ယောက်ျားတစ်စုက အမျိူးသမီးတစ်ယောက်ကို ရန်မူနေတဲ့အချိန်မှာတော့ ဝင်ရောက်ကူညီခဲ့ခြင်း မရှိပါဘူး။ အဲဒီအချိန်မှာပဲ ဦးလေးဖြစ်သူ Uncle Bhim က ရန်မူခံနေရတဲ့ အမျိူးသမီးကို ဝင်ရောက်ကူညီခဲ့တာကြောင့် ဓားထိုးခံရပြီး သေဆုံးသွားပါတယ်။ ဒီအဖြစ်အပျက်တွေကြောင့်ပဲ Pavitr ဟာ ကြီးမားတဲ့ စွမ်းအားတွေမှာ ကြီးလေးတဲ့ တာဝန်ယူမှုတွေ ရှိတယ်ဆိုတာကို သိသွားခဲ့ပါတယ်။ အဲဒီအချိန်ကျတော့မှ Pavitr ဟာ Mumbai ရဲ့ Spider-Man ဖြစ်လာခဲ့ပါတယ်။
စွမ်းအားများ
Pavitr ရဲ့ စွမ်းအားတွေကတော့ ကျွန်တော်တို့ သိထားတဲ့ Spider-Man စွမ်းအားတွေနဲ့ အတူတူပဲ ဖြစ်ပါတယ်။ Pavitr ဟာ နံရံပေါ်ကို တက်နိုင်ပြီး Spider-Man တိုင်းမှာရှိတဲ့ Spider-Sense ကိုလည်း ပိုင်ဆိုင်ထားပါတယ်။ Strength ၊ Stamina ၊ Durability နဲ့ Speed တို့ဟာလည်း သာမန်လူတွေထက် သာလွန်ပြီး Healing Factor လည်း ရှိပါတယ်။ ဒါ့အပြင် Pavitr ဟာ Peter Parker လိုပဲ ဉာဏ်ရည်အလွန်ကောင်းသူလည်း ဖြစ်ပါတယ်။
Legos
(ဆံရစ်ဝိုင်းဝက်ဘ်ဆိုဒ်တွင် ဖော်ပြထားသော သတင်း၊ဆောင်းပါးများကို အခြားမည်သည့် ဝက်ဘ်ဆိုဒ်၊ Facebook စာမျက်နှာတွင်မျှ ကူးယူဖော်ပြခွင့် မပြုပါကြောင်း အသိပေးအပ်ပါသည်။)