ဂျပန်လူမျိုးတွေ ယုံကြည်ကြတဲ့ ရိုးရာသရဲတစ္ဆေ၊ မကောင်းဆိုးဝါးများ

နိုင်ငံတစ်ခုစီတိုင်းမှာ မကောင်းဆိုးဝါး ဝိဉာဉ်တွေ၊ မိစ္ဆာတွေနဲ့ ပတ်သက်တဲ့ ယုံကြည်မှုတွေကိုယ်စီ ရှိကြပါတယ်။ အလားတူပဲ ဂျပန်နိုင်ငံမှာဆိုရင်လည်း ရိုးရာအရရော၊ ဒဏ္ဍာရီပုံပြင်တွေအရရော ယုံကြည်ထားကြတဲ့ မကောင်းဆိုးဝါး၊ သရဲတစ္ဆေတွေ များစွာပဲ ရှိပါတယ်။ အဲ့ဒီ့ထဲကမှ ဂျပန်နိုင်ငံရဲ့ နာမည်ကြီး မကောင်းဆိုးဝါး၊ သရဲတစ္ဆေတွေအကြောင်းကို ဖော်ပြပေးလိုက်ပါတယ်။

(1) အကြောက်တရားကို စားသုံးတဲ့ မကောင်းဆိုးဝါး (BURUBURU)

Buruburu ကတော့ သရဲဆိုတာထက် မကောင်းဆိုးဝါးလို့ ပြောရင် ပိုမှန်မယ်လို့ ထင်ပါတယ်။ သူဟာ အကြောက်တရားကို စားသုံးတဲ့ မကောင်းဆိုးဝါး ဖြစ်ပြီး ဂျပန်လူမျိုးတွေ ကြောက်လန့်တဲ့အခါ ထွက်လာတဲ့အသံကို အစွဲပြုပြီး သူ့ရဲ့အမည်ကို ပေးထားတာ ဖြစ်ပါတယ်။

ဒီမကောင်းဆိုးဝါး မွေးဖွားပုံကတော့ ထူးဆန်းပါတယ်။ လူတစ်ယောက်က သူရဲဘောကြောင်စွာ ပြုမူတဲ့အခါ၊ ဒါမှမဟုတ် အရမ်းကြောက်လန့်နေတဲ့အခါမျိုးတွေမှာ ဒီမကောင်းဆိုးဝါးက မွေးဖွားလာတတ်ပါတယ်။ သူမွေးဖွားလာပြီဆိုတာနဲ့ ကြောက်နေတဲ့သူရဲ့ လည်ဂုတ်ကို ဖြည်းညှင်းစွာ ပွတ်သပ်ပြီး ကြက်သီးတွေထလာတဲ့အထိ ကြောက်လန့်လာအောင် လုပ်တတ်ပါတယ်။ အဲ့ဒီ့နောက် ဖြစ်ပေါ်လာတဲ့ အကြောက်တရားကိုမှ သူက စားသုံးပါတယ်။

အတိုပြောရရင် လူတစ်ယောက် ကြောက်တဲ့အခါ သူမွေးဖွားလာမယ်။ ပြီးတာနဲ့ ကြောက်နေတဲ့လူကို ပိုကြောက်အောင် လုပ်မယ်။ ဖြစ်လာတဲ့ အကြောက်တရားကို စားသုံးမယ်။ အဲ့လိုနဲ့ပဲ မဆုံးနိုင်တဲ့ သံသရာလည်နေမှာပါ။

(2) သရဲသင်္ဘောသားများ (FUNAYUREI)

Funayurei  ကတော့ သရဲသင်္ဘောသားတွေလို့ အဓိပ္ပာယ်ရပါတယ်။ သူတို့ဟာ ပင်လယ်ထဲမှာ အုပ်စုလိုက်နေပြီး သူတို့ရဲ့အင်အားကို ကြီးမားလာအောင်လုပ်တဲ့ သရဲအုပ်စု ဖြစ်ပါတယ်။ သူတို့ဟာ ရေနစ်ပြီးသေသွားတဲ့ သင်္ဘောသားတွေ ဖြစ်ပြီး ပင်လယ်ထဲမှာ သွားလာနေတဲ့ လူတွေကို သတ်ပစ်ပြီး သူတို့ရဲ့အဖွဲ့ဝင် ဖြစ်လာအောင် လုပ်တာပါ။

ပင်လယ်လမ်းခရီးသွားနေရင်းနဲ့ မြူတွေထူလာပြီး သင်္ဘောတစ်စီး ရုတ်တရက် ပေါ်လာပြီဆိုရင် သေဖို့က (၇၀)ရာခိုင်နှုန်းနဲ့ အထက်မှာ ရှိနေပါပြီ။ သူတို့ရဲ့ သရဲသင်္ဘောကြီးဟာ ခရီးသွားတွေရဲ့ သင်္ဘောနားကို ကပ်လာလေ့ရှိပြီး သင်္ဘောပေါ်ကလူတွေကို သတ်ဖြတ်ကြပါတယ်။

ဒီလိုမဟုတ်လည်း သင်္ဘောဘေးဘောင်ကနေ တွယ်တက်လာတတ်ကြပြီး သင်္ဘောကို မှောက်အောင် သင်္ဘောဝမ်းဗိုက်တွေ ဖောက်ပစ်တာမျိုး လုပ်တတ်ကြပါသေးတယ်။ တစ်ခါတစ်လေကျရင်တော့ သရဲသင်္ဘော မဟုတ်ဘဲနဲ့ သရဲအကြီးကြီး ပေါ်လာပြီး သင်္ဘောတွေကို အလုံးလိုက် မှောက်ပစ်ကြတယ်လို့ ဆိုပါတယ်။

(3) ကလေးငိုသံနဲ့ အဘိုးကြီးသရဲ (KONAKI-JIJI)

KONAKI-JIJI ကတော့ ကလေးတစ်ယောက်လို ငိုနေတဲ့ အဘိုးကြီးလို့ အဓိပ္ပာယ်ရပါတယ်။ ဒီသရဲဟာ တောထဲမှာ သေအောင် ပစ်ထားခံခဲ့ရတဲ့ ကလေးတစ်ယောက်ရဲ့ဝိဉာဉ် ဖြစ်ပါတယ်။

သူ ခြောက်လှန့်တဲ့ပုံစံကတော့ တောထဲကို ဖြတ်သွားတဲ့ ခရီးသွားတွေက သွားနေရင်းနဲ့ ကလေးငိုသံကို ကြားရတာပါ။ အသံလာရာကို လိုက်ရှာရင်းနဲ့ အပင်တွေကြားထဲကနေ ငိုနေတဲ့ ကလေးလေးကို တွေ့ရလေ့ ရှိပါတယ်။ သနားလို့ ကောက်ချီပြီး ကိုယ်နဲ့အတူ ခေါ်သွားမယ်ဆိုရင်တော့ ကံဆိုးပါပြီ။

ကလေးကို ချီပြီး သွားနေရင်း တဖြည်းဖြည်းနဲ့ လေးလာတတ်ပါတယ်။ ဒါကို သတိထားမိပြီး ငုံ့ကြည့်လိုက်တဲ့အချိန်မှာတော့ ကလေးရဲ့မျက်နှာက အဘိုးကြီးတစ်ယောက်ရဲ့ မျက်နှာ ဖြစ်နေတတ်ပါတယ်။ ရုတ်တရက်မို့ ကြောက်လန့်သွားတဲ့ အချိန်မှာတော့ နောက်ကျသွားပါပြီ။ အဲ့ဒီ့အချိန်မှာ ကလေးက အရမ်းကို လေးလာပြီးတော့ ချီထားတဲ့လူက မလှုပ်နိုင်တော့ဘဲ ပိပြီးသေရတော့တယ်လို့ ဆိုကြပါတယ်။

(4) အသက်ဝင်လာတတ်တဲ့ ပစ္စည်းများ (TSUKUMOGAMI)

ဒါကတော့ သရဲတွေ၊ မကောင်းဆိုးဝါးတွေ ဆိုတာထက်ပိုတဲ့ ဂျပန်လူမျိုးတွေရဲ့ အယူဝါဒတစ်ခု ဖြစ်ပါတယ်။ ဂျပန်တွေမှာ ရှိတဲ့ အယူအဆတစ်ခုကတော့ ကျွန်တော်တို့ နေ့စဉ်အသုံးပြုနေတဲ့ ပစ္စည်းတွေထဲက ဘယ်ပစ္စည်းပဲဖြစ်ဖြစ် သူတို့ရဲ့သက်တမ်းက နှစ်(၁၀၀)ကျော်သွားပြီဆိုရင် ကိုယ်ပိုင်အသိစိတ် ဝင်လာကြပါသတဲ့။ ဒီပစ္စည်းတွေဟာ ခြေတွေလက်တွေ၊ မျက်လုံးတွေ ပေါက်လာတတ်ကြပြီး ညဘက် ပိုင်ရှင်အိပ်ပြီဆိုရင် ပေါ်လာကြတယ်လို့ ဆိုပါတယ်။

သာမန်အားဖြင့်ဆိုရင်တော့ သူတို့က အန္တရာယ်မရှိကြပါဘူး။ လူတွေကို အပျော်သဘောသာ လိုက်ခြောက်လေ့ရှိပါတယ်။ ဒါပေမဲ့ သူတို့အဲ့လိုမဖြစ်ခင်အချိန်မှာ သူတို့ကို သေချာအသုံးမပြုဘဲ ပစ်ထားမယ်၊ ချောင်ထိုးထားမယ် ဆိုရင်တော့ သူတို့ကိုပိုင်တဲ့ ပိုင်ရှင် အိပ်နေတဲ့အချိန်မှာ သတ်ကြပါတယ်။ အခုစာဖတ်နေတဲ့သူလည်း ပစ္စည်းတွေကို သေချာ ရိုရိုသေသေ သုံးပါနော်။

(5) စက္ကူမီးအိမ်သရဲ (BAKECHOCHIN)

ဒါကတော့ အသက်ဝင်လာတတ်တဲ့ ပစ္စည်းသရဲ (tsukumogami) တွေထဲက နာမည်ကြီးတဲ့ သရဲတစ်မျိုး ဖြစ်ပါတယ်။ Bakechochin လို့ခေါ်ကြပြီး စက္ကူမီးအိမ်သရဲလို့ အဓိပ္ပာယ်ရပါတယ်။

ဂျပန်လူမျိုးတွေ ပြောကြတဲ့ ဒဏ္ဍာရီပုံပြင်တွေထဲမှာတော့ အိမ်မှာ အသုံးပြုနေတဲ့ စက္ကူမီးအိမ်ဟာ နှစ်တစ်ရာကျော်သွားပြီဆိုတာနဲ့ အသက်ဝင်လာကြတယ်လို့ ဆိုပါတယ်။ အဲ့ဒီ့အခါ မီးအိမ်မှာ ကြီးမားကျယ်ပြန့်တဲ့ ပါးစပ်ကြီးနဲ့ ရှည်လျားတဲ့ လျှာကြီး ထွက်လာတတ်ပြီး တစ်ခါတစ်လေမှာဆို ခြေတွေလက်တွေပါ ပေါက်လာတတ်တယ်လို့ ပြောကြတာ ရှိပါတယ်။

များသောအားဖြင့်တော့ သူတို့က အန္တရာယ်မရှိကြပါဘူး။ ခရီးသွားတွေကို အပျော်အပျက်အနေနဲ့သာ ခြောက်လှန့်လေ့ရှိပါတယ်။ သို့ပေမယ့် အခြားပုံပြင်တွေရဲ့ အဆိုအရ အဲ့လိုမီးအိမ်တွေဟာ နာကျည်းမုန်းတီးစွာနဲ့ သေဆုံးသွားရတဲ့ လူတွေရဲ့ ဝိဉာဉ်တွေအတွက် နားခိုရာတွေ ဖြစ်လာတတ်တယ်လို့ ဆိုကြပါတယ်။

အမုန်းတရားတွေ ပြည့်နှက်နေတဲ့ ဝိဉာဉ်တွေသာ အသက်ဝင်လာတဲ့ မီးအိမ်ထဲကို ဝင်သွားပြီဆိုရင်တော့ သေလောက်အောင်ကို ခြောက်လှန့်တတ်ကြပါတယ်။ မတော်တဆများ အဲ့ဒီ့မီးအိမ်ကို တစ်ယောက်ယောက်က သွားဖွင့်လိုက်မိပြီဆိုရင် အထဲက ဝိဉာဉ်သရဲကြီးက ထွက်လာပြီး သေတဲ့အထိ ခြောက်လှန့်ကြပါတော့တယ်။

ဒါကတော့ မြောက်များလှစွာသော ဂျပန်ရိုးရာ သရဲတစ္ဆေတွေထဲက နာမည်ကြီးတဲ့အချို့ကို ရွေးချယ်ဖော်ပြပေးလိုက်တာ ဖြစ်ပါတယ်။ ဖတ်ပြီးလို့ သဘောကျရင် သူငယ်ချင်း၊ မိတ်ဆွေတွေလည်း ဖတ်ရအောင်လို့ ရှဲပေးသွားပါဦး။

Lego Les