Apple Original Films နဲ့ Skydance စတူဒီယိုတို့ ပူးပေါင်းဖန်တီးသွားမယ့် The Family Plan ဆိုတဲ့ ရုပ်ရှင်သစ်ထဲမှာတော့ နာမည်ကျော်မင်းသား Mark Wahlberg ကို မြင်တွေ့ရဦးမှာ ဖြစ်ပါတယ်။ သရုပ်ဆောင် Mark Wahlberg ကတော့ မကြာခင်တုန်းကပဲ Uncharted ရုပ်ရှင်ထဲမှာ ပါဝင်ခဲ့ပါသေးတယ်။ သူဟာ များသောအားဖြင့် Action ၊ Comedy ရုပ်ရှင်တွေထဲမှာ ပါဝင်လေ့ရှိပြီး မကြာခင်မှာလည်း Netflix ရဲ့ Me Time ဆိုတဲ့ ဟာသကားထဲမှာ Kevin Hart နဲ့အတူ ပါဝင်လာဦးမှာ ဖြစ်ပါတယ်။
![](https://sanyitwine.com/wp-content/uploads/2022/08/2-51.jpg)
Mark Wahlberg ဟာ The Family Plan ရုပ်ရှင်ထဲမှာ ပါဝင်လာမယ့်အကြောင်းကိုတော့ Deadline သတင်းဌာနက ဖော်ပြခဲ့တာ ဖြစ်ပါတယ်။ ဒီရုပ်ရှင်ထဲမှာတော့ သူဟာ မိသားစုတစ်ခုရဲ့ အဖေနေရာက ပါဝင်သရုပ်ဆောင်ထားပြီး တစ်ရက်မှာတော့ သူ့ရဲ့အတိတ်က မကောင်းတဲ့အရာတွေက သူ့အနောက်ကို လိုက်လာတာကြောင့် သူ့ရဲ့မိသားစုနဲ့အတူ ပြေးလွှားကြရတဲ့အကြောင်း ဖြစ်ပါတယ်။
ဒီရုပ်ရှင်ကိုတော့ ဒါရိုက်တာ Simon Cellan Jones က ရိုက်ကူးထားပြီး ဇာတ်ညွှန်းကိုတော့ Orphan: First Kill ရဲ့ ဇာတ်ညွှန်းကို ရေးသားခဲ့တဲ့ David Coggeshall က ဖန်တီးထားပါတယ်။ ဒါ့အပြင် သရုပ်ဆောင် Mark Wahlberg ၊ Stephan Levinson ၊ David Allison ၊ Dana Goldberg နဲ့ Don Granger တို့က Producer တွေအဖြစ် ပါဝင်ထားပါတယ်။
![](https://sanyitwine.com/wp-content/uploads/2022/08/1-51-e1660890074590.jpg)
လောလောဆယ်မှာတော့ The Family Plan ရုပ်ရှင်ဟာ ရိုက်ကူးရေး ပြီးဆုံးသွားပြီလို့ သိရပါတယ်။ ဒီရုပ်ရှင်ကလည်း Mark Wahlberg သရုပ်ဆောင်နေကျ Action ၊ Comedy အမျိူးအစား ဖြစ်ပါတယ်။ လောလောဆယ်မှာတော့ ထွက်ရှိလာမယ့် နေ့ရက်ကို မကြေညာသေးပါဘူး။ ဘယ်လိုပဲဖြစ်ဖြစ် ဒီရုပ်ရှင်ကလည်း ကြည့်ရှုသူတွေကို စိတ်အပန်းပြေစေမယ့် ရုပ်ရှင်တစ်ကား ဖြစ်မယ်လို့ ယူဆရပါတယ်။
Legos
Source: Screenrant