နာမည်ကျော် animated ရုပ်ရှင် Toy Story ထဲက အသံသရုပ်ဆောင်တစ်ဦး ဖြစ်တဲ့ မင်းသမီးကြီး Estelle Harris ဟာ အသက်(၉၃)နှစ်အရွယ်မှာပဲ ကွယ်လွန်သွားခဲ့ပြီလို့ သိရပါတယ်။
Estelle ဟာ Toy Story ထဲမှာတော့ Mrs. Potato Head ဇာတ်ကောင်နေရာက အသံသရုပ်ဆောင်ခဲ့သူ ဖြစ်ပါတယ်။ မင်းသမီးကြီးဟာ ကယ်လီဖိုးနီးယားပြည်နယ်၊ Palm Desert က နေအိမ်မှာပဲ သက်ကြီးရောဂါနဲ့ ကွယ်လွန်ခဲ့တာလို့ သိရပါတယ်။ ဒီအကြောင်းကိုတော့ ကျန်ရစ်တဲ့ မိသားစုက စနေနေ့မှာ Deadline သတင်းဌာနကတဆင့် ကြေညာချက် ထုတ်ပြန်ပြီး ပရိသတ်တွေကို အသိပေးခဲ့တာ ဖြစ်ပါတယ်။
“Estelle Harris ဟာ ဒီကနေ့ ညနေ(၆:၂၅)နာရီ အချိန်မှာပဲ ကွယ်လွန်သွားပြီ ဖြစ်တဲ့အကြောင်း နှမျောတသကြီးစွာ၊ ဝမ်းနည်းစွာနဲ့ပဲ အသိပေးလိုက်ရပါတယ်။ သူမရဲ့ ကြင်နာမှု၊ စိတ်အားထက်သန်မှု၊ ဟာသဉာဏ်ရွှင်မှု၊ ကိုယ်ချင်းစာ နားလည်ပေးနိုင်မှုနဲ့ ချစ်ခြင်းမေတ္တာတွေဟာ တကယ်ကို ပြိုင်ဘက်ကင်းပါပဲ။ သူမကို သိကျွမ်းခင်မင်ခဲ့သူအားလုံးဟာ သူမကို နှမျောတသစွာနဲ့ လွမ်းဆွတ်နေကြရတော့မှာပါပဲ … ” လို့ မင်းသမီးကြီးရဲ့ သားဖြစ်သူ Glen Harris က ကြေညာချက်မှာ ပြောကြားထားပါတယ်။
မင်းသမီးကြီး Estelle Harris ကတော့ နာမည်ကျော် sit-com ဇာတ်လမ်းတွဲ Seinfeld ထဲက Estelle Costanza ဇာတ်ရုပ်နဲ့လည်း ကျော်ကြားသလို Toy Story ရုပ်ရှင်ထဲက Mrs. Potato Head ဇာတ်ကောင်နဲ့လည်း လူသိများပါတယ်။ မင်းသမီးကြီးဟာ Toy Story 2 ထဲမှာ စတင်ပါဝင်ခဲ့တာ ဖြစ်ပြီး Toy Story 3 နဲ့ 4 မှာလည်း ဆက်လက် ပါဝင်ခဲ့သူ ဖြစ်ပါတယ်။
Vancouver
Source: people