Simon Cowell ဟာ E-Bike နဲ့ ပတ်သက်ရင် ကံမကောင်းမှုတွေနဲ့ ကြုံနေရပါတယ်။ အကြောင်းကတော့ သူဟာ ဒုတိယအကြိမ်မြောက် E-Bike ထပ်မှောက်ပြီး ကံကောင်းထောက်မစွာနဲ့ အသက်ဘေးက လွတ်မြောက်ခဲ့ရတာကြောင့်ပါပဲ။
ဖြစ်ပုံကတော့ Simon ဟာ ဆောင်းရာသီကြောင့် အေးခဲနေတဲ့ E-Bike ထိုင်ခုံပေါ်မှာ စီးနင်းလာရင်းက ချော်ပြီး ဘီးက လွတ်ထွက်သွားကာ လူကတော့ မြောက်တက်သွားတာ ဖြစ်ပါတယ်။ တစ်နာရီ မိုင်(၂၀)နှုန်းနဲ့ မောင်းနှင်လာတဲ့ အရှိန်ကြောင့် Simon ဟာ E-Bike ရဲ့ handle ပေါ်ကနေ မြောက်တက်သွားပြီး လမ်းလယ်ခေါင်ပေါ်ကို ပစ်ကျသွားတယ်လို့ သိရပါတယ်။
ကံကောင်းစွာနဲ့ ဘေးမှာရှိနေတဲ့ လမ်းသွားလမ်းလာ သုံးယောက်ဟာ အရှိန်နဲ့ မောင်းနှင်လာတဲ့ ကားတွေကို ရပ်တန့်ပေးဖို့ အကူအညီတောင်းခံပေးခဲ့ကြပါတယ်။ ဒါကြောင့်ပဲ Simon တစ်ယောက် ကားကြိတ်ခံရမယ့်ဘေးက သီသီလေး လွတ်မြောက်ခဲ့တယ်လို့ သိရပါတယ်။
The Sun သတင်းစာကို ဒီဖြစ်ရပ်အကြောင်း မျက်မြင်တွေ့လိုက်ရသူတွေရဲ့ ပြောကြားချက်အရ Simon ဟာ ကံကောင်းလို့ အသက်ရှင်ခဲ့တာလို့ ဆိုပါတယ်။ “Simon က ဦးထုပ်လည်း မဆောင်းထားပါဘူး။ သူ့မျက်နှာမှာလည်း ကွဲပြဲပြီး သွေးတွေနဲ့။ သူ့ကို ကြည့်ရတာ Phantom of the Opera ထဲကလိုပဲ … ” လို့ ဆိုပါတယ်။
အဲဒီနောက်မှာတော့ Simon ကို အရေးပေါ်ကားတစ်စီးနဲ့ ဆေးရုံကို ပို့ဆောင်ခဲ့ပြီး X-Ray ဓာတ်မှန်တွေလည်း ရိုက်ခဲ့ရတယ်လို့ ဆိုပါတယ်။ အဲဒီနေ့ ညနေပိုင်းအချိန်မှာတော့ ဆေးရုံကနေ ဆင်းခဲ့ရပြီး လက်တစ်ချောင်းလုံး ပုခုံးအထိ ကျောက်ပတ်တီးစည်းထားရတယ်လို့ ဆိုပါတယ်။
အသက်(၆၂)နှစ်အရွယ်ရှိပြီ ဖြစ်တဲ့ America’s Got Talent ပြိုင်ပွဲရဲ့ ဒိုင်လူကြီး Simon Cowell ဟာ ပြီးခဲ့တဲ့ ၂၀၂၀ ခုနှစ် ဩဂုတ်လတုန်းကလည်း အလားတူပဲ E-Bike မှောက်ခဲ့ဖူးပါသေးတယ်။ အဲဒီတုန်းကတော့ အယ်လ်အေမြို့ပေါ်မှာ E-Bike စီးနေရင်း တိမ်းမှောက်ခဲ့တာ ဖြစ်ပြီး ခါးနဲ့ ကျောဘက်မှာ ပြင်းပြင်းထန်ထန် ဒဏ်ရာရရှိခဲ့ပါသေးတယ်။
Glasgow
Source: hollywoodlife