*** Spoiler Alert ***
Secret Invasion ဇာတ်လမ်းတွဲရဲ့ အပိုင်း(၂)ကတော့ မကြာခင်ကပဲ ထွက်ရှိလာခဲ့ပါတယ်။ ဒီအပိုင်းထဲက Rhodey နဲ့ Fury တို့စကားပြောကြတဲ့ ဇာတ်ဝင်ခန်းကို ကြည့်ရှုပြီးနောက်မှာတော့ ပရိသတ်တွေဟာ Rhodey က Skrull ဖြစ်နေနိုင်တယ်လို့ ခန့်မှန်းနေကြပါတယ်။ ဒါကြောင့်ပဲ ဒီတစ်ခါမှာတော့ Rhodey က Skrull ဖြစ်နေနိုင်ကြောင်း ပြသနေတဲ့ အချက်တွေကို ဖော်ပြပေးချင်ပါတယ်။
Fury ကို Nick လို့ခေါ်ခဲ့တဲ့ Rhodey
Rhodey က Skrull ဖြစ်နေနိုင်ကြောင်း ပြသနေတဲ့ အချက်တွေထဲက အသိသာဆုံးအချက်ကတော့ Rhodey ဟာ Fury ကို Nick လို့ခေါ်ခဲ့တာပဲ ဖြစ်ပါတယ်။ ၂၀၁၉ ခုနှစ်မှာ ထွက်ရှိခဲ့တဲ့ Captain Marvel ရုပ်ရှင်ထဲမှာတော့ Fury ဟာ ဒီနည်းလမ်းကိုပဲ အသုံးပြုပြီး Skrull က လူယောင်ဆောင်နေမှန်း သိခဲ့တာပါ။ ဒါ့အပြင် Fury ဟာ သူ့ကို ဘယ်သူ့ကမှ Nick လို့ မခေါ်ဘူးလို့လည်း ပြောခဲ့ပါသေးတယ်။
ဒါပေမယ့်လည်း MCU ထဲက အချို့သော ဇာတ်ကောင်တွေကတော့ Fury ကို Nick လို့ခေါ်ခဲ့တာမျိူး ရှိပါတယ်။ ဥပမာပြောရရင် Tony Stark ကလည်း Nick လို့ ခေါ်ခဲ့ဖူးပြီး ဒီဇာတ်လမ်းတွဲရဲ့ အပိုင်း(၁)ထဲမှာလည်း Maria ဟာ မသေဆုံးခင်လေးမှာ Nick လို့ ခေါ်သွားခဲ့ပါတယ်။
သို့သော်လည်း Rhodey ဟာ Fury ကို Nick လို့ ခေါ်ရလောက်တဲ့အထိ ရင်းနှီးလားဆိုတာကတော့ ပြောရခက်ပါတယ်။ ဒါ့အပြင် Rhodey ဟာ Fury ကို S.A.B.E.R. ကနေ အလုပ်ထုတ်လိုက်တာကြောင့် စော်ကားတဲ့အနေနဲ့ Nick လို့ ခေါ်လိုက်တာလည်း ဖြစ်နိုင်ပါတယ်။
Skrull တွေရဲ့ ကျူးကျော်မှုအကြောင်းကို သိနေတဲ့ Rhodey
Fury နဲ့ စကားပြောနေတဲ့ ဇာတ်ဝင်ခန်းမှာပဲ Rhodey ဟာ Skrull တွေရဲ့ ကျူးကျော်မှုအကြောင်းကို လွန်ခဲ့တဲ့ (၁၅)နှစ်လောက်ကတည်းက သိနေတယ်လို့ ပြောသွားပါတယ်။ ဒါကြောင့်ပဲ MCU Timeline ရဲ့ ၂၀၁၀ ခုနှစ်လောက်မှာ Rhodey ဟာ Skrull တွေအကြောင်း Presentation အတွက် Pentagon ကို ဖိတ်ကြားခံခဲ့ရပုံပေါ်ပါတယ်။ ဒီအချိန်မှာ Skrull တွေက Rhodey နေရာမှာ အစားထိုးဝင်ဖို့ အချိန်ကောင်းဖြစ်ပေမယ့် Timeline အရ အဲဒီအချိန်မှာတော့ Skrull တွေဟာ Fury ရဲ့လက်အောက်မှာ ရှိနေဆဲဖြစ်ပါတယ်။
ယခုလိုကျူးကျော်မှုတွေ စတင်တာကတော့ လွန်ခဲ့တဲ့ နှစ်အနည်းငယ်လောက်ကမှ Gravik က ဦးဆောင်ပြီး စတင်ခဲ့တာ ဖြစ်ပါတယ်။ တစ်ဖက်မှာတော့ Skrull တွေအကြောင်း သိထားတဲ့ Rhodey ဟာ Gravik ရဲ့ပစ်မှတ် ဖြစ်ခဲ့နိုင်ပါတယ်။ ဒါကြောင့်ပဲ Skrull တွေဟာ Blip ဖြစ်နေချိန်၊ ဒါမှမဟုတ် Blip ဖြစ်ပြီးသွားတဲ့အချိန်မှာ Rhodey ကို အစားထိုးခဲ့ပုံရပါတယ်။ Rhodey ဟာ အမေရိကန်သမ္မတရဲ့ လက်ရုံးလည်း ဖြစ်နေတာကြောင့် ဒီရာထူးဟာ Skrull တွေအတွက် အလွန်အသုံးဝင်တဲ့ ရာထူးတစ်ခုလည်း ဖြစ်ပါတယ်။
အမေရိကန်သမ္မတရဲ့ လက်ရုံးဖြစ်နေတာကိုက သံသယဖြစ်စရာကောင်းနေပါတယ်။
Rhodey ဟာ အမေရိကန်သမ္မတရဲ့ လက်ရုံးဖြစ်နေတဲ့ အချက်ကလည်း သံသယဖြစ်စရာတော့ကောင်းပါတယ်။ အကြောင်းကတော့ Rhodey ဟာ Civil War ထဲမှာဆိုရင် Sokovia စာချုပ်မှာ လက်မှတ်ထိုးမိခဲ့တာကို နောင်တရသွားတာကြောင့် Infinity War ထဲမှာတော့ US Secretary Ross ရဲ့အမိန့်ကို မနာခံခဲ့ပါဘူး။
Infinity War ထဲမှာတော့ လက်မှတ်မထိုးခဲ့တဲ့ Avengers တွေကို ဝရမ်းပြေးတွေအဖြစ် သတ်မှတ်ထားဆဲ ဖြစ်ပါတယ်။ ဒါကြောင့်ပဲ Rhodey ဟာ အရေးကြီးတဲ့အမိန့်ကို ဖီဆန်ခဲ့ပြီး နှစ်အနည်းငယ်အကြာမှာ အမေရိကန်သမ္မတရဲ့လက်ရုံး ဖြစ်နေတာဟာ သံသယဖြစ်စရာကောင်းနေပါတယ်။
Fury ကို အလုပ်ထုတ်ခဲ့တဲ့ Rhodey
အပေါ်မှာ ဖော်ပြခဲ့သလိုပဲ Rhodey ဟာ Fury ကို S.A.B.E.R. ကနေ အလုပ်ထုတ်ပစ်ခဲ့ပါတယ်။ ရုရှားမှာ ဖြစ်ခဲ့တဲ့ ဗုံးကွဲမှုဟာ Maria Hill အပါအဝင် ရုရှားလူမျိူး ထောင်နဲ့ချီပြီး သေဆုံးခဲ့တာကြောင့် အမေရိကန်အစိုးရဟာ ရုရှားနဲ့ ပြဿနာမဖြစ်အောင် Fury နဲ့ လုံးဝအဆက်အဆံ ဖြတ်ပစ်လိုက်တာလည်း ဖြစ်ပါတယ်။ ဒါပေမယ့်လည်း Fury ကို အလုပ်ထုတ်လိုက်တာကြောင့် Fury ဟာ Skrull တွေနဲ့တိုက်ဖို့ ဘာထောက်ပံ့မှုမှ မရတော့ပါဘူး။
ဒါကြောင့်ပဲ Fury ကို အလုပ်ထုတ်လိုက်တာက သွယ်ဝိုက်သောအားဖြင့် Skrull တွေကို ကူညီသလို ဖြစ်နေပါတယ်။ ဒါ့အပြင် Rhodey ကိုယ်တိုင်ကလည်း Fury ကို အလုပ်ထုတ်ကြောင်းပြောဖို့ သူကိုယ်တိုင် Volunteer လုပ်ခဲ့တယ်လို့ ပြောသွားပါတယ်။ ဒါကြောင့်ပဲ Rhodey ကသာ Skrull ဖြစ်နေမယ် ဆိုရင်တော့ Fury ကို အလုပ်ထုတ်ဖို့ သူကိုယ်တိုင် အားပေးခဲ့တာ ဖြစ်နိုင်ပြီး ကမ္ဘာကိုသိမ်းမယ့် Gravik ရဲ့မစ်ရှင်ကို ပိုမိုလွယ်ကူသွားအောင် ကူညီနေတယ်လို့ ယူဆနိုင်ပါတယ်။
Legos
(ဆံရစ်ဝိုင်းဝက်ဘ်ဆိုဒ်တွင် ဖော်ပြထားသော သတင်း၊ဆောင်းပါးများကို အခြားမည်သည့် ဝက်ဘ်ဆိုဒ်၊ Facebook စာမျက်နှာတွင်မျှ ကူးယူဖော်ပြခွင့် မပြုပါကြောင်း အသိပေးအပ်ပါသည်။)