ေအာက္တြင္ ေဇာ္ဂ်ီျဖင့္ ဖတ္ပါ။
အရုပ်ကလေးတွေဟာ လူတိုင်းရဲ့ ငယ်ဘဝတုန်းက အကောင်းဆုံး သူငယ်ချင်းတွေပါ။ ကလေးအရွယ်တွေကို လက်ဆောင်ပေးပြီဆိုရင်လည်း အရုပ်လေးတွေသာ ပေးလိုက်၊ ဘယ်သူမှ ငြင်းမယ့်သူ မရှိပါဘူး။ အရုပ်လေးတွေဟာ သာမန်အားဖြင့် ချစ်စရာလေးတွေ ဆိုပေမယ့် မထင်မှတ်ထားတဲ့ မကောင်းဆိုးဝါး အမှောင့်ပယောဂတွေ ဝင်ရောက်ပူးကပ်လာတဲ့အခါမှာတော့ ကလေးတင်မက ရှိသမျှ လူကြီးတွေပါ ထိတ်လန့်ရတဲ့အထိ ဖြစ်စေနိုင်ပါတယ်။ အခုဖော်ပြပေးမှာကတော့ အပြင်လောကမှာ တကယ်ရှိပြီး နာမည်ကြီးတဲ့ ဝိဉာဉ်ပူးကပ်နေတဲ့ ကြောက်စရာအရုပ်(၅)ရုပ် အကြောင်းပဲ ဖြစ်ပါတယ်။
(1) Annabelle
Annabelle ရုပ်ရှင်က တကယ့်အဖြစ်အပျက်ကို ပြန်ရိုက်ထားတယ်ဆိုတာ သိကြမှာပါ။ သရဲဝိဉာဉ်ပူးကပ်နေတဲ့ အရုပ်တွေထဲမှာ Annabelle အရုပ်က လူသိအများဆုံး ဖြစ်ပါတယ်။ ရုပ်ရှင်ကားထဲမှာဆိုရင် Annabelle နေရာမှာ ထည့်ထားတဲ့ အရုပ်က ကြောက်စရာကောင်းတဲ့ပုံစံ ဖြစ်ပေမဲ့ တကယ့်အပြင်မှာတော့ အဲ့လိုမဟုတ်ပဲ ချစ်ဖို့ကောင်းတဲ့ မျက်နှာလေးနဲ့ အဝတ်ရုပ်ကလေးပါ။
Annabelle စဖြစ်လာပုံကတော့ Donna လို့ ခေါ်တဲ့ သူနာပြုမလေးက သူမရဲ့အမေဆီကနေ Annabelle အရုပ်ကို ၁၉၇၀ခုနှစ်မှာ လက်ဆောင်အဖြစ် ရခဲ့တာက စပါတယ်။ အဲ့ဒီအရုပ်က Donna နဲ့ သူ့ရဲ့ အခန်းဖော် Angie တို့ အိမ်မှာ မရှိတဲ့အချိန်ဆိုရင် သူ့အလိုလို တိုက်ခန်းထဲမှာ ရွေ့လျားနေတယ်လို့ ဆိုပါတယ်။ အရုပ်ပဲမို့လို့ သူ့ဘာသာ ရွေ့ချင်လည်း ရွေ့နေပါလေ့စေဆိုပြီး ကောင်မလေးနှစ်ယောက်က သည်းခံဖို့ ကြိုးစားခဲ့ပေမယ့် နောက်ပိုင်းမှာတော့ ဒီ့ထက်ပိုပြီးဆိုးလာခဲ့ပါတယ်။
အဲ့ဒီအရုပ်က သူ့ကိုကူညီပါလို့ စာရေးပြီး အကူအညီတောင်းလာပါတယ်။ အဲ့ဒီနောက်ပိုင်းမှာတော့ အရုပ်က Angie ရဲ့ရည်းစားကောင်လေးကို တိုက်ခိုက်ခဲ့ပါတယ်။ အရုပ်ရဲ့ဂါဝန်မှာ သွေးတွေကို တွေ့တဲ့အခါမှာတော့ ကောင်မလေးနှစ်ယောက်ဟာ ဝိဉာဉ်ရေးရာကျွမ်းကျင်သူတစ်ဦးကို ခေါ်ပြီး အကူအညီတောင်းခဲ့ပါတယ်။ အဲ့ဒီ့မှာတင် အရုပ်မှာ Annabelle လို့ခေါ်တဲ့ မိန်းကလေးတစ်ယောက်ရဲ့ ဝိဉာဉ် ပူးကပ်နေမှန်း သိခဲ့ကြရတာ ဖြစ်ပါတယ်။
အဲ့နောက်မှာတော့ ကောင်မလေးနှစ်ယောက်ဟာ သဘာဝလွန်ဖြစ်ရပ်တွေမှာ နာမည်ကြီးနေတဲ့ Warren မောင်နှံကို ဆက်သွယ်ပြီး အကူအညီတောင်းခဲ့ကြပါတယ်။ Warren မောင်နှံနဲ့ တွေ့တဲ့အခါကျမှပဲ သူတို့ရဲ့အခက်အခဲက ပြေလည်သွားပါတော့တယ်။ Warren မောင်နှံက အရုပ်ကို ကောင်မလေးတွေဆီကနေ ယူလာခဲ့ပြီး မှန်ပေါင်းချောင်ထဲမှာ သော့ခတ်ကာ သိမ်းဆည်းထားလိုက်ကြပါတယ်။
(2) Robert the Doll
နာမည်ကြီး Horror ရုပ်ရှင် Child’s Play ထဲက ကြောက်စရာ Chucky အရုပ်ဟာ ဒီအရုပ်ကို မှီငြမ်းပြီး ရိုက်ကူးထားတာ ဖြစ်ပါတယ်။ Robert လို့အမည်ပေးထားတဲ့ ဒီအရုပ်ကို ဂျာမနီက နာမည်ကြီး အရုပ်ကုမ္ပဏီတစ်ခုက ထုတ်လုပ်ခဲ့တာပါ။ ဒီအရုပ်ကိုတော့ ဖလော်ရီဒါပြည်နယ်မှာ နေထိုင်တဲ့ Robert Eugene “Gene” Otto လို့ခေါ်တဲ့ အနုပညာသမားတစ်ယောက်က သူကလေးဘဝ ၁၉၀၄ ခုနှစ်မှာ မွေးနေ့လက်ဆောင်အဖြစ် ရရှိခဲ့တာ ဖြစ်ပါတယ်။
Gene ဆီကို အရုပ်ရောက်လာပုံကတော့ ဇာတ်လမ်းနှစ်မျိုး ဖြစ်နေပါတယ်။ ပထမတစ်ခုကတော့ သူ့အဘိုးက ဂျာမနီကို ခရီးသွားတုန်းက ဝယ်လာခဲ့တာလို့ ဆိုပါတယ်။ နောက်တစ်မျိုးကတော့ Gene တို့မိသားစုက အမှားတစ်ခုခု လုပ်မိတာကြောင့် အောက်လမ်းအတတ်ပညာ တတ်ကျွမ်းတဲ့ အိမ်အစေခံတစ်ယောက်က ကလဲ့စားချေတဲ့အနေနဲ့ ဒီအရုပ်ကို လက်ဆောင်ပေးခဲ့တာလို့လည်း ပြောကြပါတယ်။
အရုပ်ဟာ စရောက်လာကတည်းက သင်္ဘောသားဝတ်စုံကို ဝတ်ဆင်ထားပြီး အဆိုပါဝတ်စုံဟာ Gene ငယ်ဘဝက ဝတ်ဆင်တဲ့ပုံစံနဲ့ ဆင်တူတယ်လို့လည်း ဆိုပါတယ်။ အရုပ်ရဲ့ အရွယ်အစားကလည်း တကယ့် ကလေးတစ်ယောက်ရဲ့ အရွယ်အစားမျိုး ဖြစ်တာကြောင့် ပိုပြီးတော့ လန့်ဖို့ကောင်းနေပါတယ်။
ဒီအရုပ်ဟာ ပုံစံကတင် ထူးဆန်းနေတာ မဟုတ်ပါဘူး။ အရုပ်ရဲ့မျက်နှာအမူအရာက ပြောင်းလဲနေတတ်သလို အိမ်ထဲမှာလည်း သူ့ဘာသာ နေရာတွေ ရွေ့နေတတ်တယ်လို့ ဆိုပါတယ်။ လူတွေပြောကြတဲ့ သီအိုရီတစ်ခုကတော့ Gene ဟာ သူ့ရဲ့ငယ်ဘဝက အဆင်မပြေခဲ့တဲ့ မကျေနပ်မှုတွေကို အရုပ်အပေါ် အပြစ်တင်ပုံချရင်းနဲ့ အရုပ်ထဲမှာရှိတဲ့ မကောင်းဆိုးဝါးကို ထွက်လာအောင် လုပ်ပေးမိသလို ဖြစ်သွားတယ်လို့ ဆိုပါတယ်။
Gene ဟာ အရုပ်ကို သူငယ်ငယ်က အဝတ်အစားတွေ ဝတ်ပေးတတ်သလို သူ့ရဲ့ရှေ့ဆုံးနာမည်ဖြစ်တဲ့ Robert ကိုလည်း အရုပ်ရဲ့အမည်အဖြစ် ပေးထားပါတယ်။ အိမ်ထဲမှာ နေထိုင်ခဲ့တဲ့ လူတွေရဲ့ပြောစကားအရ Gene ဟာ အရုပ်နဲ့လည်း စကားတွေ အပြန်အလှန် ပြောနေလေ့ရှိတယ်လို့ ဆိုပါတယ်။
(3) Elmo
စကားပြောတတ်တဲ့ မွှေးပွအရုပ်လေး Elmo ဟာ အရောင်းရဆုံး အရုပ်တွေထဲမှာ ပါဝင်ပါတယ်။ စတင်ထုတ်လုပ်ခဲ့ချိန် ၁၉၉၆ ခုနှစ်ကစလို့ အားလပ်ရက်တွေမှာ လက်ဆောင်ပေးစရာ အရုပ်အနေနဲ့ကို ရေပန်းစားခဲ့တာ ဖြစ်ပါတယ်။ အစောပိုင်း ထုတ်လုပ်ခဲ့တဲ့ Elmo ရုပ်တွေဟာ ကလိထိုးလိုက်ရင် ရယ်မောကြပါတယ်။
သို့ပေမယ့် နှစ်တွေကြာလာတဲ့အခါ ကာစတန်မာတွေက စကားပြောတတ်တာလေးကို လိုချင်တယ်ဆိုပြီး တောင်းဆိုလာကြပါတယ်။ အဲ့ဒါနဲ့ပဲ ပိုင်ရှင်ရဲ့နာမည်ကို ပြောတတ်တဲ့ အရုပ်ကလေး Elmo အဖြစ်နဲ့ အဆင့်မြှင့်ပြီး ထုတ်လုပ်ရောင်းချခဲ့ကြပါတယ်။
သို့ပေမယ့် ၂၀၀၈ ခုနှစ်မှာ Bowman မိသားစုက သူတို့ရဲ့ နှစ်နှစ်အရွယ် သားလေး James အတွက် ဒီအရုပ်လေးကို ဝယ်ပေးလိုက်တဲ့အချိန်မှာတော့ ဘယ်သူမှ ရှင်းမပြနိုင်တဲ့အရာတွေ ဖြစ်လာပါတော့တယ်။ ဒီအရုပ်လေးတွေဟာ သူတို့ရဲ့ပိုင်ရှင်နာမည်နဲ့ အခြားစကားစု တစ်ချို့တစ်လေကို ပြောဖို့အတွက်သာ ပရိုဂရမ် ဆွဲထားတာ ဖြစ်ပါတယ်။ ဒါပေမဲ့ James ကို ဝယ်ပေးထားတဲ့ အရုပ်လေးကို ဓာတ်ခဲလဲပြီးတဲ့နောက်မှာတော့ အရုပ်က သူ့ဘာသာ စကားတွေ လက်တန်းပြောနေခဲ့ပြီးတော့ ချစ်စရာအသံလေးနဲ့ “James ကို သတ်” ဆိုပြီး အော်နေတတ်ပါသတဲ့။
(4) Mandy the Haunted Doll
Mandy လို့ခေါ်တဲ့ အရုပ်ကလေးဟာ ကြည့်လိုက်ရင် ချစ်စရာလေးပေမယ့် တကယ်တမ်းမှာတော့ ကြောက်စရာလေးလို့ ပြောရင် ပိုမှန်ပါလိမ့်မယ်။ အခုလက်ရှိ သူ့ကို ကနေဒါနိုင်ငံက Quesnel ပြတိုက်မှာ ထိန်းသိမ်းပြသထားပါတယ်။
ပြတိုက်ဝန်ထမ်းတွေရဲ့ ပြောပြချက်အရ သူ့ကိုတစ်ခြားအရုပ်တွေနဲ့ မှန်ဘောင်တစ်ခုတည်းမှာ ရောထားလို့မရဘဲ သူ့တစ်ရုပ်တည်းသီးသန့် မှန်ဘောင်တစ်ခုနဲ့ ထားရတယ်လို့ ဆိုပါတယ်။ သူ့ကို တစ်ခြားအရုပ်တွေနဲ့ မှန်ဘောင်တစ်ခုတည်း တူတူထားလိုက်ရင် တစ်ခြားအရုပ်တွေက အမြဲတမ်း မှောက်ထိုးမှောက်လန်တွေ ဖြစ်နေတတ်တယ်လို့ ဆိုပါတယ်။
ဒါတင်မက ပြတိုက်ဝန်ထမ်းတွေရဲ့ နေ့လယ်စာတွေဟာလည်း မကြာခဏ ပျောက်သွားလေ့ရှိတယ်လို့ သိရပါတယ်။ ပြတိုက်ကို အလည်လာတဲ့ ဧည့်သည်တွေက သူ့ကို ဓာတ်ပုံရိုက်ဖို့ လုပ်ရင်လည်း မအောင်မြင်တာက များတယ်လို့ ဆိုပါတယ်။ ဒီအရုပ်ဟာ ၁၉၁၀ ခုနှစ်ဝန်းကျင်က ဥရောပမှာ ထုတ်လုပ်ခဲ့တာဖြစ်ပြီး ကလေးပုံစံ ကြွေအရုပ်လေး ဖြစ်ပါတယ်။ ဒီအရုပ်ရဲ့ပိုင်ရှင်အမျိုးသမီးကတော့ အရုပ်က ညဘက်ဆိုရင် ငိုနေတတ်လို့ ကြောက်လာတဲ့အဆုံး ပြတိုက်ကို လာလှူခဲ့တာလို့ ပြောပြထားပါတယ်။
(5) The Haunted Gang
အရုပ်တွေမှာ မကောင်းဆိုးဝါးဝိဉာဉ်တွေ ဝင်ပူးပြီး ဆိုးဆိုးဝါးဝါးတွေ လုပ်ပြီဆိုရင် ပိုင်ရှင်တွေက စွန့်ပစ်ကြတာ ပုံမှန်ပါပဲ။ သို့ပေမယ့် တစ်ချို့တွေကတော့ ထူးတာတွေ၊ ဆန်းတာတွေကိုမှ စိတ်ဝင်စားတတ်ကြတာလည်း ရှိပါတယ်။ ဒါကြောင့်ပဲ ဝိဉာဉ်ပူးကပ်နေတယ်လို့ ယူဆရတဲ့ အရုပ်ရှစ်ရုပ်ကို သဘာဝလွန်ဖြစ်ရပ်တွေ စိတ်ဝင်စားတဲ့ ပုဂ္ဂိုလ်တစ်ဦးက collection အနေနဲ့ ဝယ်ယူစုဆောင်းထားခဲ့ပါတယ်။
အဲ့ဒီ့အရုပ်ရှစ်ရုပ်ရဲ့ နာမည်တွေကတော့ Chrystal ၊ Monika ၊ Sharla ၊ True ၊ Isaac ၊ Lilly ၊ Cameron နဲ့ Ashley တို့ ဖြစ်ပါတယ်။ အဆိုပါ အရုပ်တွေရဲ့ပိုင်ရှင်ဟာ အရုပ်တွေထားတဲ့အခန်းနဲ့ ကျန်တဲ့တစ်အိမ်လုံးကို ကင်မရာတွေတပ်ဆင်ပြီး အမြဲတမ်း မှတ်တမ်းတင်ထားခဲ့ပါတယ်။ ဒီလိုနဲ့ ၂၀၀၉ခုနှစ်ရဲ့ ညတစ်ညမှာတော့ သူရဲ့ကင်မရာတစ်လုံးမှာ ကလေးပုံစံနဲ့ ဝိဉာဉ်လို့ ယူဆရတဲ့ ပုံရိပ်တစ်ခုကို လှေကားခွင်နားမှာ ပေါ်လာတာ တွေ့လိုက်ရတယ်လို့ ဆိုပါတယ်။
ဒါကတော့ မကောင်းဆိုးဝါးဝိဉာဉ်တွေ ဝင်ရောက်ပူးကပ်နေပြီး ပိုင်ရှင်တွေကို ဒုက္ခရောက်စေခဲ့တဲ့ အရုပ်ငါးရုပ်အကြောင်းပဲ ဖြစ်ပါတယ်။ စာဖတ်သူတို့ သိထားတဲ့ အခြားအရုပ်အကြောင်းတွေ ရှိရင်လည်း ပြန်လည်မျှဝေခဲ့ပါဦး။