Mai Davika ဟာ မြန်မာပရိသတ်တွေကြားမှာတော့ Pee Mak ဇာတ်ကားနဲ့ လူသိများပါတယ်။ သူမရဲ့ ညို့ငင်စွမ်း ပြင်းလွန်းတဲ့ အကြည့်လေးတွေနဲ့ လူကို ငေးသွားလောက်စေမယ့် အပြုံးလေးတွေကြောင့် မင်းသမီးချောလေးတစ်လက်အဖြစ်လည်း ကျော်ကြားသူပါ။ သူမကိုချစ်ပြီး အားပေးသူတွေအတွက် သူမအကြောင်းလေးတွေ သိရအောင် ဖော်ပြပေးလိုက်ပါတယ်။
Davika Hoorne ဆိုတာဟာ သူ့ရဲ့နာမည်ရင်းဆိုပေမဲ့ ပရိသတ်တွေကြားထဲမှာတော့ Mai (သို့မဟုတ်) Mai Davika လို့ပဲ ခေါ်ကြပါတယ်။ သူမရဲ့ မွေးနေ့ကတော့ ၁၉၉၂ ခုနှစ် မေလ (၁၆) ရက်နေ့ ဖြစ်လို့ ယခုဆိုရင် (၂၈)နှစ်ပြည့်တော့မှာ ဖြစ်ပါတယ်။ ဘန်ကောက်မြို့မှာ မွေးဖွားခဲ့တဲ့ ဘန်ကောက်သူစစ်စစ်ဖြစ်ပြီး ယခုချိန်ထိလည်း ဘန်ကောက်မှာပဲ နေထိုင်ပါတယ်။ အညိုနုရောင်မျက်လုံးလေးနဲ့ သူလေးရဲ့ အရပ်ကတော့ (၅)ပေ(၉)လက်မ ရှိပြီး ကိုယ်အလေးချိန်ကတော့ (၅၆) ကီလိုဂရမ် (၁၂၃ ပေါင်) ရှိပါတယ်။
သူမဟာ Danny Hoorne နဲ့ Rattanakorn Chomyong ဆိုတဲ့ မိဘနှစ်ပါးက မွေးဖွားခဲ့ပြီး ဘယ်လ်ဂျီယမ်သွေးနဲ့ထိုင်းသွေး စပ်ထားတဲ့ ကပြားမလေးတစ်ယောက် ဖြစ်ပါတယ်။ သူမမှာ Davinia Hoorne နဲ့ Elene Hoorne လို့ခေါ်တဲ့ ညီအစ်မနှစ်ယောက်လည်း ရှိပါသေးတယ်။
ပညာရေးနဲ့ ပတ်သက်ရင်တော့ Rangsit တက္ကသိုလ်မှာ Communication Arts မေဂျာနဲ့ ဘီအေဘွဲ့ကို ရရှိထားပါတယ်။ သူမဟာ Taurus ရာသီဖွားဖြစ်ပြီး Thor မင်းသားဖြစ်တဲ့ Chris Hemsworth ကတော့ သူလေးရဲ့ အကြိုက်ဆုံးမင်းသား ဖြစ်ပါသတဲ့။ ရုပ်ရှင်ကြည့်ရတာ၊ မော်တော်ဆိုင်ကယ် စီးရတာနဲ့ Twitter သုံးရတာကို ဝါသနာပါတယ်လို့လည်း သိရပါတယ်။
သူမ ရုပ်ရှင်လောကထဲကို စတင်ဝင်ရောက်ခဲ့တဲ့အချိန်ကတော့ ၂၀၁၀ခုနှစ်ပါ။ Ngao Kammathep ဆိုတဲ့ တီဗွီစီးရီးကတော့ သူမ ပထမဆုံး ပါဝင်သရုပ်ဆောင်ဖူးတဲ့ စီးရီးဖြစ်ပြီး ခေါင်းဆောင်မင်းသမီးအဖြစ်နဲ့ ပါဝင်ထားတာပါ။ ပထမဆုံး ရိုက်ဖူးတဲ့ ရုပ်ရှင်ကားကတော့ Fatherland လို့ အမည်ရပါတယ်။ သူမကို ထိုင်းပြည်တွင်းမှာ နာမည်စကြီးစေခဲ့တဲ့ ရုပ်ရှင်ကတော့ Heart Attack လို့ အမည်ရတဲ့ ရုပ်ရှင်ဇာတ်ကား ဖြစ်ပါတယ်။
Mai ဟာ ရုပ်ရှင်နယ်ပယ်ဘက်ကို မရောက်ခင် သူမ အသက်(၁၄)နှစ်မှာတင် ကြော်ငြာမော်ဒယ်လ်တစ်ယောက် ဖြစ်လာခဲ့သူပါ။ စီးပွားရေးလုပ်ငန်းများစွာအတွက် ကြော်ငြာတွေ ရိုက်ကူးပေးခဲ့ပြီး တစ်နေ့မှာတော့ ထိုင်းနိုင်ငံက Channel 7 ဆိုတဲ့ ရုပ်သံလိုင်းနဲ့ စာချုပ်ချုပ်ဆိုနိုင်ခဲ့ရာကနေ သရုပ်ဆောင်တစ်ယောက် ဖြစ်လာခဲ့ပါတယ်။ သို့ပေမယ့် ၂၀၁၆ခုနှစ်မှာတော့ Channel 7 ရဲ့ လောင်းရိပ်အောက်က ရုန်းထွက်ပြီး အလွတ်တန်းမင်းသမီးတစ်လက် ဖြစ်လာခဲ့ပါတယ်။
တရိပ်ရိပ် ထိုးတက်လာနေခဲ့တဲ့ သူမရဲ့အောင်မြင်မှုကို နေ့ချင်းညချင်း တစ်ဟုန်ထိုး ဘဝပြောင်းသွားစေတာကတော့ Pee Mak ရုပ်ရှင်ပဲ ဖြစ်ပါတယ်။ Pee Mak ရုပ်ရှင်ဟာ ထိုင်းနိုင်ငံအတွင်းမှာ ဝင်ငွေအကောင်းဆုံး ရုပ်ရှင်တစ်ကား ဖြစ်ခဲ့ပြီး Mai ဟာလည်း ငယ်ငယ်လေးနဲ့ နာမည်ကြီး ထိပ်တန်းမင်းသမီးတွေရဲ့ စာရင်းမှာ ပါဝင်သွားခဲ့ပါတယ်။
သူမဟာ ရုပ်ရှင်နဲ့ ပတ်သက်လို့ ထိုင်းပြည်တွင်းက ချီးမြှင့်တဲ့ ဆုများစွာကို ရရှိထားသူဖြစ်ပြီး ၂၀၁၆ခုနှစ်မှာတော့ ကိုရီးယားနိုင်ငံမှာ ကျင်းပပြုလုပ်ခဲ့တဲ့ ဆုချီးမြှင့်ပွဲမှာ Asia Model Awards ကို မင်းသား Mario Maurer နဲ့အတူ ပူးတွဲရရှိခဲ့ပါတယ်။ ဒါတင်မက သူမဟာ ယူနီဆက်ဖ်ရဲ့ သံတမန်တစ်ဦးဖြစ်ပြီး ထိုင်းနိုင်ငံရဲ့ တောရိုင်းတိရစ္ဆာန် ထိန်းသိမ်းရေးအဖွဲ့မှာလည်း သံတမန်အဖြစ် ခန့်အပ်ခံထားရသူ ဖြစ်ပါတယ်။
Mai ဟာ မော်ဒယ်လ်နဲ့ ရုပ်ရှင်လောကမှာတင် မဟုတ်ဘဲ စီးပွားရေးကိုလည်း စိတ်ဝင်စားသူ ဖြစ်ပါတယ်။ သူမမှာ Misstarbydavika လို့ခေါ်တဲ့ ကိုယ်ပိုင်လုပ်ငန်းတစ်ခုရှိပြီး ပဝါတွေ၊ ဦးထုပ်တွေနဲ့ အခြားအဝတ်အစား အသုံးအဆောင်တွေကို ထုတ်လုပ်ရောင်းချပါတယ်။ အဆိုပါလုပ်ငန်းက အောင်မြင်လာတဲ့အခါ လုပ်ငန်းကို ထပ်ချဲ့တဲ့အနေနဲ့ Misstar Fresh လို့အမည်ရတဲ့ air fresheners တွေကိုပါ ထုတ်လုပ်ရောင်းချလာပြီး Misstar Cafe လို့ခေါ်တဲ့ ကော်ဖီဆိုင်ကိုလည်း ဖွင့်လှစ်ထားပါတယ်။
Mai ရဲ့ အချစ်ရေးကို ကြည့်မယ်ဆိုရင်တော့ ၂၀၁၈ခုနှစ် နှစ်လယ်ပိုင်းလောက်တည်းက စပြီး မင်းသားချော Chantavit Dhanasevi နဲ့ တွဲနေတာကို တွေ့ရပါတယ်။ မင်းသား Chantavit ကတော့ မြန်မာပရိသတ်တွေကြားမှာ ပေါက်ခဲ့တဲ့ ATM Error ဇာတ်ကားထဲက မင်းသားပဲ ဖြစ်ပါတယ်။
ဒါကတော့ Mai Davika ရဲ့ ဘဝအကြောင်း တစေ့တစောင်းပဲ ဖြစ်ပါတယ်။ ဖတ်ပြီးလို့ နှစ်ခြိုက်တယ်ဆိုရင်လည်း မိတ်ဆွေတွေပါ ဖတ်လို့ရအောင် ရှဲပေးသွားပါဦး။