Ariana Grande နဲ့ သူမရဲ့ခင်ပွန်းဖြစ်သူ Dalton Gomez တို့ဟာ အိမ်ထောင်သက်တမ်း (၂)နှစ်နဲ့ လမ်းခွဲလိုက်ကြပြီလို့ သတင်းတွေ ထွက်ပေါ်လာပါတယ်။ တကယ်တော့ အသက်(၃၀)နှစ်အရွယ် ရှိပြီဖြစ်တဲ့ Ariana နဲ့ အသက်(၂၇)နှစ်အရွယ် Dalton တို့ဟာ ယခုနှစ်အစောပိုင်းတည်းက သပ်သပ်စီ ခွဲနေနေကြတာလို့ အတွင်းသတင်းတွေက ဆိုပါတယ်။
သူတို့လမ်းခွဲလိုက်တဲ့ သတင်းကိုတော့ TMZ သတင်းဌာနက ပထမဆုံး ဖော်ပြခဲ့တာ ဖြစ်ပါတယ်။ Ariana ဟာ သူမရဲ့ Wicked ရုပ်ရှင်ကို ရိုက်ကူးဖို့ လန်ဒန်ကို ရောက်ရှိနေတာဖြစ်ပြီး ပြီးခဲ့တဲ့ weekend မှာ Wimbledon ကွင်းက ကစားပွဲကို လာရောက်ကြည့်ရှုခဲ့တုန်းက သူမရဲ့စေ့စပ်လက်စွပ်နဲ့ လက်ထပ်လက်စွပ် ဝတ်ထားတာကို မတွေ့ခဲ့ရတာက ဒီသတင်း စတင်ပေါ်ထွက်လာတာ ဖြစ်ပါတယ်။
တကယ်တော့ မနှစ်က ဩဂုတ်လတုန်းက သူမဟာ makeup tutorial တစ်ခု တင်ခဲ့ပြီး အဲဒီထဲမှာ လက်ထပ်လက်စွပ် မဝတ်ထားတုန်းကလည်း ကွဲပြီဆိုတဲ့ သတင်းတွေ ထွက်ခဲ့ပါသေးတယ်။ ဒါပေမယ့်လည်း အဲဒီတုန်းကတော့ Ariana ဟာ ချက်ချင်းဆိုသလိုပဲ ပြန်ဖြေရှင်းခဲ့ပါတယ်။
“ကျွန်မ လက်ထပ်လက်စွပ်ကို မဝတ်ထားတာက သန့်ရှင်းရေး လုပ်ထားလို့ပါ။ ရှင်တို့ ထင်နေသလို ကျွန်မ ကွာရှင်းတော့မှာ မဟုတ်ပါဘူး …” လို့ အဲဒီတုန်းက ပြန်ဖြေရှင်းခဲ့ပါတယ်။
ဒါ့အပြင် ပြီးခဲ့တဲ့ မေလတုန်းကလည်း သူတို့ရဲ့ နှစ်နှစ်ပြည့် မင်္ဂလာနှစ်ပတ်လည်နေ့ကို Ariana က ပို့စ်တစ်ခုတင်ပြီး Dalton ကို ဘယ်လောက်ချစ်ကြောင်း ပြောခဲ့ပါသေးတယ်။ သို့သော်လည်း ယခုလို သတင်းတွေ ထွက်ပေါ်လာချိန်မှာတော့ လက်ရှိအချိန်ထိ ဘာမှဖြေရှင်းတာကိုတော့ မတွေ့ရသေးပါဘူး။
အတွင်းသတင်းတွေရဲ့ အဆိုအရ ဇိမ်ခံအိမ်ခြံမြေ အကျိုးဆောင် Dalton Gomez ဟာ အလုပ်ကြိုးစားပြီး ရိုးရိုးကုပ်ကုပ် နေတတ်သူလို့ သိရပါတယ်။ သူဟာ မထင်မရှားနေရတာကိုပဲ သဘောကျပြီး လူတွေဆီက အာရုံစိုက်မှုတွေကိုလည်း မလိုချင်ဘူးလို့ ဆိုပါတယ်။ ဒါကြောင့်ပဲ Dalton ဟာ တခြားဆယ်လီတွေရဲ့ အထင်ကြီးမှုကို ရရှိနိုင်တဲ့သူ မဟုတ်ပေမယ့် Ariana အတွက်တော့ ပြီးပြည့်စုံတဲ့သူတစ်ယောက် ဖြစ်နေခဲ့တယ်လို့ အတွင်းသတင်းတွေက ပြောကြပါတယ်။
သူတို့နှစ်ယောက်ဟာ ၂၀၂၀ ခုနှစ် ဇန်နဝါရီလက စတွဲခဲ့ကြတာ ဖြစ်ပြီး ၂၀၂၁ ခုနှစ် မေလမှာ လက်ထပ်ခဲ့ကြတာ ဖြစ်ပါတယ်။
Vancouver
Source: people